የኢትዮጵያ መገናኛ ብዙኃን ባለሥልጣን የትግራይ መገናኛ ብዙኃን ኤጀንሲን ፈቃድ አሳደሰ

የኢትዮጵያ መገናኛ ብዙኃን ባለሥልጣን ቀደም ሲል ታግዶ የነበረውን የትግራይ መገናኛ ብዙኃን ኤጀንሲ፣ "ትግራይ ብሮድካስቲንግ ኮርፖሬሽን" በሚል አዲስ ስያሜ ፈቃዱን እንደገና መስጠቱን አስታውቋል። ባለሥልጣኑ ቀደም ሲል የኤጀንሲው ፈቃድ የታገደው ብሔራዊ ጥቅምን የሚጻረሩ፣ ጽንፈኝነትን የሚያበረታቱ እና የሕዝብ ደኅንነትን አደጋ ላይ የሚጥሉ ይዘቶችን በማሰራጨት ምክንያት እንደነበር አስታውሷል።

የአሁኑ የፈቃድ እድሳት የተከናወነው የትግራይ ክልል ባለአደራ አስተዳደር ሚዲያው ለሰላምና መረጋጋት እንዲሁም ለሕዝብ ድምፅነት አስተዋጽኦ እንዲያደርግ በማሰብ ባቀረበው ጥያቄ መሠረት ነው። ባለሥልጣኑ ጥያቄውን በመመርመር እና ከመገናኛ ብዙኃን አዋጅ ጋር የሚጣጣም ሆኖ በማግኘቱ ውሳኔውን ማስተላለፉን ገልጿል። በመጨረሻም ባለሥልጣኑ የሚመለከታቸው አካላት ሁሉ ለአዲሱ የትግራይ ብሮድካስቲንግ ኮርፖሬሽን አስፈላጊውን ትብብር እንዲያደርጉ ጥሪ አቅርቧል።