ቤት ምኽሪ ጉዳያት እስልምና ኢትዮጵያ ንኣኼብኡ ዛዚሙ

ቤት ምኽሪ ጉዳያት እስልምና ኢትዮጵያ ንኻልኣይ ዓመት ቀዳማይ ስሩዕ ሓፈሻዊ ኣኼብኡ ንክልተ መዓልታት ድሕሪ ምኽያድ ዛዚሙ። እቲ ቤት ምኽሪ ኣብ ዝተፈላለዩ ከባቢታት ሃገር ዝርአ ዘሎ ግጭታት ብሰላማዊ መንገዲ ንክፍታሕ ፃውዒት ብምቕራብ 11 ነጥቢ ዘለዎ መግለጺ ኣውጺኡ። ፕሬዚዳንት ቤት ምኽሪ ሸኽ ሓጂ ኢብራሂም ቱፋ ህዝቢ ሙስሊም ስራሕቲ ልምዓትን ሰላምን ሃገር ንክድግፍ ጻውዒት ኣቕሪቦም፣ መንግስቲ ንመሰረተ ፋይናንስ ሽሪዓን እስላማዊ ባንክን ንዘርኣዮ ደገፍ አመስጊኖም።

ኣብቲ መዛዘሚ ስነ-ስርዓት ዝተረኸቡ ምክትል ቀዳማይ ሚኒስትር ተመስገን ጥሩነህ ብወገኖም፣ ፍልልያት ብሃይማኖታዊ ክብርታትን ባህላዊ ናይ ዕርቅ ስልትታትን ብሰላማዊ መንገዲ ክፍታሕ ከምዝግባእ ገሊጾም። ሚኒስትር ሰላም ሓዊሱ ዝተፈላለዩ ላዕለዎት ሓለፍቲ ስራሕ መንግስቲ ኣብቲ ስነ-ስርዓት ተረኺቦም እዮም።