ኮሚሽን ሲቪል ሰርቪስ ኢትዮጵያ ንሰራተኛ መንግስቲ ዝምልከት ሓድሽ መምርሒ ኣዳሊዩ

ኮሚሽን ሲቪል ሰርቪስ ኢትዮጵያ ሰራተኛ መንግስቲ ብባህሪ፣ ብክእለትን ኣገልግሎትን ንምምዛን ዘኽእሉ 18 ሓደሽቲ መምርሒታት ከምዘዳለወ ኣፍሊጡ። በዚ ሓድሽ ስርዓት መሰረት ሰራተኛ መንግስቲ ኣብ ስርሖም ንምጽናሕ ወይ ንምዕባይ ብውሕዱ 70 ሚእታዊት ክረኽቡ ኣለዎም። ከምኡ እውን ልዕሊ 90 ሚእታዊት ንዘምጽኡ ሰራተኛታት ናይ ክልተ ደረጃ፣ ካብ 75-90 ሚእታዊት ንዘምጽኡ ድማ ናይ ሓደ ደረጃ ደመወዝ ወሰኽ ክግበረሎም እዩ። እቲ ምዘና ሰራተኛታት ንምቅናስ ዘይኮነስ ዓቕሞም ንምዕባይ ዝዓለመ ምዃኑ ኮሚሽነር ዶክተር መኩሪያ ሃይለ ገሊጾም። እቲ ፈተና ዘይሓለፉ ሰራተኛታት ኣብ ውሽጢ ሽድሽተ ወርሒ ካልኣይ ግዜ ናይ ምፍታን ዕድል ክህልዎም እዩ።