Waldaa Gamtaa Hojjettootaa Itoophiyaa: Dhaabbileen 50% ol balaa hojii irratti isaan mudatu gabaasaa hin jiran

Waldaa Gamtaa Hojjettootaa Itoophiyaa (CETU) akka ibsetti, dhaabbileen biyyattii keessa jiran keessaa harki 50 ol balaa hojii irratti isaan mudatu qaama dhimmi ilaallatuuf gabaasaa hin jiran. Itti gaafatamaan waajjira hariiroo alaafi ummataa kan waldaa kanaa Obbo Ayalew Ahimad, seerichi dhaabbileen balaa gabaasuu akka qaban dirqisiisu illee, hanqinni to'annoo gabaasa dhugaa argachuu akka rakkise ibsaniiru. Keessattuu damee ijaarsa irratti meeshaaleen eegumsa fayyaa gahaa ta'e dhabamuun lubbuu darbuufi qaama miidhamuuf sababa ta'aa akka jiru himameera.

Miidhaa qaamaa malees, miidhaan fayyaa sababa keemikaalaan yeroo booda uumamuufi kaansarii dabalatee jiru yaaddessaa ta'uun eerameera. Obbo Ayalew, rakkoo kana furuuf keemikaalonni biyya keessa yeroo galan to'annoo cimaa akka barbaadan himaniiru. Kana malees, hojjettoonni balaa keemikaalaa irratti hubannoo gahaa akka argataniifi meeshaalee ittisaa akka fayyadaman taasisuun barbaachisaa ta'uu waldaan kun ibseera.