ከ50 በመቶ በላይ ድርጅቶች የስራ ላይ አደጋዎችን እንደማያሳውቁ ኢሠማኮ ገለጸ

የኢትዮጵያ ሠራተኞች ማኅበራት ኮንፌዴሬሽን (ኢሠማኮ) በሀገሪቱ ከ50 በመቶ በላይ የሚሆኑ ድርጅቶች የሥራ ላይ አደጋዎችን ለሚመለከተው አካል እንደማያሳውቁ አስታውቋል። የኮንፌዴሬሽኑ የውጭና ሕዝብ ግንኙነት መምሪያ ኃላፊ አቶ አያሌው አህመድ፣ ሕጉ ድርጅቶች አደጋዎችን እንዲዘግቡ ቢያዝም፣ የቁጥጥር ክፍተቶች በመኖራቸው ትክክለኛ መረጃ ለማግኘት አስቸጋሪ እንደሆነ ገልጸዋል። በተለይም በኮንስትራክሽን ዘርፍ በቂ የደህንነት መጠበቂያ መሳሪያዎች አለመኖር ለሞትና ለአካል ጉዳት እየዳረገ መሆኑ ተነስቷል።

ከአካላዊ ጉዳት በተጨማሪ በኬሚካል ተጋላጭነት ምክንያት ዘግይተው የሚመጡ የጤና እክሎችና ካንሰር አሳሳቢ መሆናቸው ተመላክቷል። አቶ አያሌው ችግሩን ለመቅረፍ ኬሚካሎች ወደ ሀገር ውስጥ በሚገቡበት ወቅት ጥብቅ ቁጥጥር ሊደረግባቸው እንደሚገባ አሳስበዋል። በተጨማሪም ሠራተኞች ስለኬሚካሎች አደጋ በቂ ግንዛቤ እንዲኖራቸውና የመከላከያ መሣሪያዎችን እንዲጠቀሙ ማድረግ እንደሚያስፈልግ የኮንፌዴሬሽኑ አቋም ነው።