የኮይሻ የውሃ ኃይል ማመንጫ ፕሮጀክት ግንባታ 77 በመቶ ደረሰ

በኦሞ ተፋሰስ እየተገነባ ያለው የኮይሻ የውሃ ኃይል ማመንጫ ፕሮጀክት 77 በመቶ ግንባታው መጠናቀቁን የኢትዮጵያ ኤሌክትሪክ ኃይል አስታወቀ። ፕሮጀክቱ ሲጠናቀቅ 1,800 ሜጋ ዋት የማመንጨት አቅም ይኖረዋል። ግድቡ 201.5 ሜትር ከፍታ እና 1.8 ኪሎ ሜትር የጎን ርዝመት ያለው ሲሆን 6.5 ቢሊዮን ኪዩቢክ ሜትር ውሃ የመያዝ አቅም ይኖረዋል።

የኢትዮጵያ ኤሌክትሪክ ኃይል ዋና ስራ አስፈጻሚ ኢ/ር አሸብር ባልቻ እንደገለጹት፣ የኮንክሪት ስራው በሰኔ 2027 ይጠናቀቃል። የመጀመሪያው ተርባይን በጥቅምት 2028 ስራ የሚጀምር ሲሆን፣ ሙሉ በሙሉ በ2029 ወደ ስራ ይገባል ተብሎ ይጠበቃል። ለፕሮጀክቱ ማጠናቀቂያ የሚያስፈልገውን 500 ሚሊዮን ዩሮ ለማግኘት ከጣሊያን መንግስት እና አበዳሪዎች ጋር ድርድር እየተደረገ ነው።