በኮሬ ዞን የታጣቂዎች ጥቃት ቀጥሏል፤ በርካታ ንጹሐን መገደላቸው ተገለጸ

በደቡብ ኢትዮጵያ ክልል ኮሬ ዞን በሚንቀሳቀሱ ታጣቂዎች አማካኝነት ንጹሐን ዜጎች መገደላቸው እና ንብረት መዘረፉ ተገለጸ። የክልሉ ምክር ቤት አባል አቶ ዴያሞ ዳሌ እንዳሉት፣ ከምዕራብ ጉጂ ዞን ጋላና እና ሱሮባርጉዳ ወረዳዎች የሚመጡ ታጣቂዎች በተደጋጋሚ ጥቃት እየፈጸሙ ሲሆን፣ የፌዴራል መንግስት ጣልቃ ካልገባ በቀር ችግሩ መፍትሄ አላገኘም። በተፈጸሙ ተከታታይ ጥቃቶች መላኩ ማዝሬ፣ ከድር አብዱ እና መሐመድ ደረሱ የተባሉ ግለሰቦች የተገደሉ ሲሆን፣ በርካታ ከብቶችም ተዘርፈዋል።

አቶ ዴያሞ እንደሚሉት፣ ችግሩ ከመሬት ይዞታ እና ከድንበር አከላለል ጋር የተያያዘ ሲሆን፣ አርሶአደሮች በስራቸው ወቅት ጥቃት ይፈጸምባቸዋል። ከዚህ ቀደም ከ400 በላይ ሰዎች መገደላቸውን የገለጹ ሲሆን፣ የፌዴራል መንግስት በሁለቱ ክልሎች መካከል ያለውን ግጭት በአግባቡ እንደማይመለከተው ተችተዋል። የጉጂ ዞን አመራሮች ምላሽ ለማካተት የተደረገው ጥረት አልተሳካም።