ኣብ ዞባ ኮሬ መጥቃዕቲ ዕጡቓት ይቕጽል ኣሎ፤ ብዙሓት ሲቪላት ከምዝተቐትሉ ተገሊጹ

ኣብ ክልል ደቡብ ኢትዮጵያ ዞባ ኮሬ ብዝንቀሳቐሱ ዕጡቓት ንጹሃን ዜጋታት ከምዝተቐትሉን ንብረት ከምዝተዘረፈን ተገሊጹ። ኣባል ቤት ምኽሪ ክልል ኣቶ ደያሞ ዳሌ ከምዝበልዎ፣ ካብ ምዕራብ ጉጂ ዞን ወረዳታት ጋላናን ሱሮባርጉዳን ዝመጹ ዕጡቓት ተደጋጋሚ መጥቃዕቲ ይፍጽሙ ከምዘለዉን፣ መንግስቲ ፈደራል ኢድ እንተዘይኣትዩ እቲ ሽግር ፍታሕ ከምዘይረክብን ገሊጾም። ብዝተፈጸመ ተኸታታይ መጥቃዕቲ መላኩ ማዝሬ፣ ከድር ኣብዱን መሓመድ ደረሱን ዝተባህሉ ግለሰባት ከምዝተቐትሉን ብዙሕ ከብቲ ከምዝተዘረፈን ተሓቢሩ።

ኣቶ ደያሞ ከምዝገለጽዎ፣ እቲ ሽግር ምስ መሬትን ኣቀማምጣ ዶባን ዝተኣሳሰረ ኮይኑ፣ ሓረስቶት ኣብ ስርሖም ከለዉ መጥቃዕቲ ይፍጸመሎም ኣሎ። ቅድሚ ሕጂ ልዕሊ 400 ሰባት ከምዝተቐትሉ ዝገለጹ ኮይኖም፣ መንግስቲ ፈደራል ኣብ መንጎ ክልቲኡ ክልላት ዘሎ ግጭት ብግቡእ ከምዘይርእዮ ነቒፎም። ካብ ሓለፍቲ ዞባ ጉጂ ምላሽ ንምርካብ ዝተገበረ ጻዕሪ ኣይተዓወተን።