የቀድሞ የትግራይ ዩኒቨርሲቲ ተማሪዎች የዝውውር ምዝገባ በአካል መምጣት ሳያስፈልግ በኦንላይን እንዲሆን ተወሰነ

በትግራይ ክልል በሚገኙ ዩኒቨርሲቲዎች ይማሩ የነበሩ ተማሪዎች ወደ ሌሎች የከፍተኛ ትምህርት ተቋማት ለማዛወር የሚያደርጉትን ምዝገባ በአካል መምጣት ሳይጠበቅባቸው በኦንላይን እንዲያከናውኑ የትምህርት ሚኒስቴር ወስኗል። ይህ ውሳኔ የተላለፈው ተማሪዎች በአካል ለመመዝገብ ወደ አዲስ አበባ በመምጣታቸው በተፈጠረው ከፍተኛ መጨናነቅ እና ብዙ ተማሪዎች ለመጓዝ አቅም በማጣታቸው ነው። የትምህርት ሚኒስትሩ ፕሮፌሰር ብርሃኑ ነጋ እና ሚኒስትር ዴኤታው ፕሮፌሰር ክንደያ ገብረሕይወት ተማሪዎችን በአካል አግኝተው መረጃውን አረጋግጠዋል።

እስከ ባለፈው ሐሙስ ከ2,808 በላይ ተማሪዎች የተመዘገቡ ሲሆን፣ ሰኞ ዕለት ብቻ 1,500 ተማሪዎች በአካል ተገኝተው ነበር። የኦንላይን ምዝገባ ሊንክ በትምህርት ሚኒስቴር ይፋዊ የመረጃ መድረክ ላይ እንደሚገለጽ ታውቋል። ፕሮፌሰር ክንደያ እንደገለጹት፣ ዩኒቨርሲቲዎች ትምህርት ለመጀመር እየተዘጋጁ በመሆናቸው የዝውውር ምደባው በቅርቡ ይጠናቀቃል።