Barattoonni waggaa tokkoffaa yuunivarsitii Tigraay keessa akka hin ramadamne ibsame

Ministirri Barnootaa Piroofeesar Birhaanuu Nagaa akka ibsanitti, barattoonni waggaa tokkoffaa yuunivarsitiiwwan naannoo Tigraay keessatti akka hin ramadamne murtaa'eera. Ministirichi murtoon kun kan fudhatame haalli nageenyaa naannichaa barattoota simachuuf mijataa waan hin taaneef ta'uu ibsanii, barattoonni bakka walitti bu'iinsi jiru keessatti akka baratan hin dirqisiifaman jedhaniiru.

Dabalataanis, barsiisonni walitti bu'iinsa uumameen walqabatee yuunivarsitiiwwan Tigraay gadi lakkisanii ba'uu barbaadan yuunivarsitiiwwan biroo keessatti akka barsiisan ni taasifama jedhameera. Ministirichi haalli nageenyaa yuunivarsitiiwwan keessa jiru qulqullina barnootaafi nageenya barattootaaf sodaachisaa ta'uu kaasanii, dargaggoonni yaada siyaasaa isaanii osoo hin ilaalin bakka tasgabbaa'aa ta'eetti barnoota isaanii hordofuu akka qaban dhaamaniiru.