Godina Gambeellaatti haleellaa raawwatameen namoonni 13 ajjeefaman

Komishinarri Poolisii naannoo Gambeellaa Doro Kaaru akka jedhanitti, aanaa addaa Itaangitti haleellaa raawwatameen namoonni 13 ajjeefamanii, 8 madaa'anii, 2 immoo bakki bu'an dhabameera. Haleellaan kun kan dhufe erga namoonni 16 godina Nuweeritti ajjeefamanii booda, haaloo bahuuf kan raawwatame akka ta'e ibsameera. Maddoonni poolisii fi jiraattonni akka jedhanitti, lola kanaaf, loogii sanyummaa caasaa nageenyaa naannichaa fi hirmaannaa hidhattoota Sudaan Kibbaa akka sababaatti kaasu. Komishinarichi hidhattoonni alaabaa Sudaan Kibbaa qabatanii jiran jiraachuu fi meeshaaleen waraanaa itti fayyadaman kan humna nageenyaa idilee akka hin taane mirkaneessaniiru. Haalli erga tasgabbaa'ee booda, hojjettoota nageenyaa loogii sanyummaa agarsiisan irratti tarkaanfiin kan fudhatamu ta'uu ibsaniiru.