በትግራይ ክልል የስልክ እና ኢንተርኔት አገልግሎት ሙሉ ለሙሉ ተቋረጠ

በትግራይ ክልል የስልክ እና የኢንተርኔት አገልግሎት ሙሉ ለሙሉ መቋረጡ ተሰምቷል። የክልሉን የቴሌኮም መሠረተ ልማት በመቆጣጠር ላይ የሚገኘው ህወሓት አገልግሎቱን እንደዘጋው የስምረት ፓርቲ አመራር አቶ ሓለፎም ንርኣ እና የሮይተርስ ምንጮች ገልጸዋል። በክልሉ ውስጥ የሚንቀሳቀሰው ሳፋሪኮምም እንዲዘጋ መታዘዙን መረጃዎች ይጠቁማሉ። ህወሓት ይህን እርምጃ የወሰደው የፌዴራል መንግስት ድሮኖች የሚያደርሱትን ጥቃት ለመከላከል እና ለፌዴራል መንግስት መረጃ የሚሰጡ አካላትን ለመቆጣጠር እንደሆነ ተነግሯል። ባለስልጣናቱ ቀደም ሲልም የኔትወርክ መቆራረጥ ሊኖር እንደሚችል ማስጠንቀቂያ ሰጥተው እንደነበር ታውቋል። ይህ የኔትወርክ መቆራረጥ በክልሉ ውስጥ ለሚገኙ ነዋሪዎች የዕለት ተዕለት እንቅስቃሴ እና የመረጃ ልውውጥ ከፍተኛ ተጽዕኖ እንደሚኖረው ይጠበቃል።