የአዲስ አበባ ምክር ቤት የከተማዋን አስፈጻሚ አካላት አዋጅ ማሻሻሉን አስታወቀ

የአዲስ አበባ ምክር ቤት የከተማዋን አስፈጻሚ አካላት ስልጣን እና ተግባር የሚወስን አዋጅ ማሻሻሉን አስታውቋል። በዚህ ማሻሻያ መሰረት የከተማዋ የትራፊክ ማኔጅመንት ባለስልጣን ታጥፎ ስልጣኑ ለትራንስፖርት ቢሮ፣ ለመንገዶች ባለስልጣን እና ለአዲሱ የትራንስፖርት ማኔጅመንት ማዕከል ተከፋፍሏል። ከዚህ በተጨማሪ የስራ እና ክህሎት ቢሮ ለሁለት ተከፍሎ የሰራተኛና ስራ እድል ቢሮ እንዲሁም የቴክኒክና ሞያ ስልጠና ቢሮ ተቋቁመዋል። የባህል እና ስነ ጥበብ ቢሮ ከቱሪዝም ኮሚሽን ጋር ተዋህዶ የባህልና ቱሪዝም ቢሮ ሆኖ ተደራጅቷል። እንዲሁም የምገባ ኤጀንሲ፣ አዲስ አበባ አመራር አካዳሚ እና ሌሎች ኤጀንሲዎች ታጥፈው ስልጣናቸው ለሌሎች ተቋማት ተላልፏል። ማሻሻያው የተደረገው የተበታተነ የአሰራር ስልጣንን በማዕከል ለማድረግ እና የመልካም አስተዳደር ችግሮችን ለመፍታት መሆኑ ተገልጿል።