ዶክተር ኣብይ ኣሕመድ እንደገና ቀዳማይ ሚኒስተር ኮይኖም ተመሪፆም፤ ኣሕመድ ሽዴ ኣፈ ጉባኤ ኮይኖም

መሓዝቲ ሕጊ ፌደራል ኢትዮጵያ ንፕሬዚዳንት ፓርቲ ብልፅግና ዝኾኑ ዶክተር ኣብይ ኣሕመድ ንተወሳኺ ናይ ሓሙሽተ ዓመት ስልጣን እንደገና ቀዳማይ ሚኒስተር ገይሮም መሪፆምዎም። ዶክተር ኣብይ ኣብዚ መዝነት እዚ ልዕሊ ሸሞንተ ዓመት ድሕሪ ምፅንሖም እዮም ነዚ ሕሬታ ረኺቦም። እቲ ምረፃ ዘካየደ ሓዲሽ ዝተዋቐረ ቤት ምኽሪ ተወከልቲ ሕዝቢ ኣብ ዘካየዶ መበገሲ ጉባኤ እዩ። ዶክተር ኣብይ ንሓዲሽ ቤት ምኽሪ ኣብ ዘስምዕዎ መደረ፡ ሓዲሽ ሕገ-መንግስቲ ምድላው ናይ ዝመፅእ ዘመን ቐዳምነት ዝወሃቦ ሓደ ዛዕባ ምኻኑ ገሊፆም። ኣብቲ ኣኼባ እቲ ቤት ምኽሪ ናይ ባዕሉ መራሕቲ እውን መሪፁ እዩ። ናይ ቀደም ሚኒስተር ፋይናንስ ዝነበሩ ኣሕመድ ሽዴ ካብ ጥቅምቲ 2018 ጀሚሮም ኣብቲ መዝነት ዝጸንሑ ታገሰ ጫፎ ብምትካእ ኣፈ ጉባኤ ኾይኖም ተመሪፆም እዮም። ብተወሳኺ ናይ ቀደም እትዮጵያ ሚኒስተር ዴታ ትምህርቲ ዝነበራ ኣየለች እሸቴ ንሎሚ በዶ ብምትካእ ምክትል ኣፈ ጉባኤ ኮይነን ተመሪፀን ኣለዋ።