IMF ንኢትዮጵያ ንዘድሊ ምትሕብባር ፋይናንስ ኣየር ንብረት ኣማራፂ ኣቕሪቡ

ትካል ገንዘብ ዓለም (IMF)፡ መንግስቲ ኢትዮጵያ ብሰንኪ ለውጢ ክሊማ ንዘጋጥሙ ተደጋጋሚ ፀገማት ንምክልኻል፡ ፋይናንስ ሃገር ከይተፅዓነ ብዝኽእል መገዲ ደገፍ ገንዘብ ክረክብ ኣማራፂ ኣቕሪቡ። እቲ ትካል 'Resilience & Sustainability Facility' (RSF) ዝተባህለ ናይ ልቓሕ ኣገልግሎት ክጥቀሙ ከምዘለዎ ኣዘኻኺሩ። እዚ ልቓሕ ንተሃዋሲት ክሊማን ትሕቲ ዓቕሚ ኣታዊ ንዘለወን ሃገራት ዝተዳለወ ኮይኑ፡ ን20 ዓመት ዝፀንሕን ናይ 10.5 ዓመት ናይ ዕረፍቲ ግዜ ዘለዎን እዩ። እቲ ትካል እዚ ሜላ ካብ ባንክታት ልምዓትን ካብ ውልቀ ወፍርን ተወሳኺ ደገፍ ንምስሓብ ከምዝሕግዝ ይኣምን። ዕላማ እቲ ትካል ድማ ኣብ እዋን ደርቅን ውሕጅን ህፁፅ ወፃኢታት ካብ ምውዳእ፡ ነዞም ተደጋጋሚ ሓደጋታት ክፃወሩ ዝኽእሉ ቀወምቲ ትካላዊ ስርዓታት ምህናፅ ከምዝኾነ ገሊፁ።