ሚኒስትር ጉዳያት ወጻኢ ኣሜሪካ ማርኮ ሩቢዮ ኣብ ኣዲስ ኣበባ ዝተፈጸመ መጥቃዕቲ ድሮን ኣረጋጊጾም

ሚኒስትር ጉዳያት ወጻኢ ኣሜሪካ ማርኮ ሩቢዮ ኣብ ከተማ ኣዲስ ኣበባ መጥቃዕቲ ድሮን ከምዝተፈጸመ ኣረጋጊጾም። እቶም ሚኒስትር ኣብ ሜሪላንድ ኣብ ዝሃብዎ መግለጺ፡ ዝኾነ ይኹን ወገን ሽበራ ከምዘይድግፍ ብምግላጽ፡ መንግስቲ ኢትዮጵያ ኣብቲ ሃገር ኣብ ዝርከቡ ዕጡቓት ጉጅለታት እናወሰደ ዘሎ ስጉምቲ ኣዘኻኺሮም። ኣብ ወርሒ መስከረም መወዳእታ ኣብ ኣዲስ ኣበባ ዝነብሩ ነበርቲ ብርቱዕ ድምጺ ተኩሲ ከምዝሰምዑ እንተተሓበረ፡ መንግስቲ በቲ እዋን እቲ ዝርዝር ሓበሬታ ኣይሃበን።

ብኻልእ ወገን ሩቢዮ ኣብ መንጎ ኢትዮጵያን ኤርትራን እናዓበየ ኣብ ዝመጽእ ዘሎ ወጥሪ ተሰሚዕዎም ዘሎ ስግኣት ገሊጾም። ኣብ መንጎ ክልቲአን ሃገራት ዝተፈጠረ ወጥሪ ዶብ ስዒቡ ሰፊሕ ቀጣናዊ ውግእ ክለዓል ከምዝኽእል ስግኣቶም ዝገለጹ እቶም ሚኒስትር፡ ኣሜሪካ ኣብ መንጎ ክልቲኦም ወገናት ናይ ሰላም አስከባሪ ተራ ንምጻወት ጻዕሪ እናገበረት ከምዘላ ኣፍሊጦም። በዚ መሰረት ድማ ምስ ክልቲአን ሃገራት ዲፕሎማሲያዊ ዝምድናኦም ዘጠናኽሩ ከምዘለዉን ቀረባ ዝርርብ ከምዘካይዱን ገሊጾም።