ኣብ ዝተፈላለዩ ከባቢታት ኢትዮጵያ ብዝተፈጸሙ መጥቃዕትታት ብዙሓት ሰባት ተቐቲሎም

ኣብ ዝሓለፈ ሰሙን ኣብ ዝተፈላለዩ ከባቢታት ኢትዮጵያ ብዝተፈጸሙ መጥቃዕትታትን ግጭታትን ብዙሓት ሰባት ህይወቶም ከምዝሰኣኑ ተገሊጹ። ኣብ ክልል ኦሮምያ ኣብ ዞባ ሆሮ ጉዱሩ ወለጋ ኣብ ዘሎ ፋብሪካ ሽኮር ፊንጫ ብዕጡቓት ኣብ ዝተፈጸመ መጥቃዕቲ 8 ሰራሕተኛታትን ኣካላት ጸጥታን ተቐቲሎም፤ ንብረት እውን ዓንዩ። በቲ ካልእ ሸነኽ፣ ኣብ ዞባ ኣርሲ ወረዳ መርቲ ብዝተፈጸመ መጥቃዕቲ ልዕሊ 14 ሰባት ህይወቶም ክሓልፍ ከሎ፣ ኣብ ከተማ ሞያሌ ብዝተለዓለ ግጭት ድማ ብውሕዱ 9 ሰባት ከምዝተቐትሉ ተሓቢሩ።

ብተወሳኺ ኣብ ክልል ደቡብ ኢትዮጵያ ኣብ ዞባታት ቡርጂን ኮሬን ብዝበጽሐ መጥቃዕቲ ሓረስቶትን ካልኦትን ሓዊሱ 8 ሰባት ከምዝተቐትሉ ነበርትን ምምሕዳርን ኣፍሊጦም። እዞም መጥቃዕትታት ምምዝባል ህዝብን ዕንወት ንብረትን ዘስዓቡ ኮይኖም፣ ኩነታት ጸጥታ ኣብ ከቢድ ስግኣት ከምዘሎ ተገሊጹ።