በደቡብ ወሎ 'ጃሪ ቁጥር 2' የተፈናቃዮች ካምፕ ላይ በደረሰ የድሮን ጥቃት 18 ሰዎች ተገደሉ

በአማራ ክልል ደቡብ ወሎ ዞን ተሁለደሬ ወረዳ በሚገኘው 'ጃሪ ቁጥር 2' የተፈናቃዮች ካምፕ ላይ በተፈጸመ የድሮን ጥቃት 18 ሰዎች መገደላቸውን የካምፑ ነዋሪዎች እና የሆስፒታል ምንጮች ለቢቢሲ ገለጹ። ጥቃቱ ሐሙስ ዕለት የተፈጸመ ሲሆን፣ በካምፑ ውስጥ የሚገኙ ሸራ መጠለያዎች ላይ ቢያንስ አራት ጊዜ ድሮኖች ጥቃት ሰንዝረዋል። የሟቾች ቁጥር 18 ሲሆን፣ ከነዚህ መካከል ሕጻናት እና ነፍሰ ጡር ሴቶች ይገኙበታል። 36 ሰዎች ለሕክምና ወደ ሐይቅ የመጀመሪያ ደረጃ ሆስፒታል የተወሰዱ ሲሆን፣ ከባድ ጉዳት የደረሰባቸው 12 ሰዎች ወደ ደሴ ሆስፒታል ተልከዋል። መንግሥት እስካሁን ስለ ጥቃቱ አስተያየት አልሰጠም።