ኣብ ሱዳንን ኣቢየን ብዝተፈጸመ መጥቃዕቲ ድሮን ልዕሊ 300 ሰባት ተቐቲሎም

ኣብ ምዕራብ ኮርዶፋንን ዞባ ኣቢየን ብዝተፈጸመ ተደጋጋሚ መጥቃዕቲ ድሮን ልዕሊ 300 ሰለማውያን ሰባት ተቐቲሎም። ሰንበት ኣብ ምዕራብ ኮርዶፋን ኣብ ዝተፈጸመ መጥቃዕቲ 150 ሰባት ክሞቱ እንከለዉ፡ ሰኑይ ድማ ኣብ ኣቢየ ኣብ ዝርከብ ዕዳጋ ብዝወረደ መጥቃዕቲ 153 ሰባት ህይወቶም ስኢኖም። ሰራዊት ሱዳን ነቲ ኣብ ኣቢየ ዝተፈጸመ መጥቃዕቲ፡ እቲ ዕዳጋ ንሰራዊት ዳዕመ ሰሪዕ ነዳዲ የቕርብ ብዝብል ምኽንያት ከምዝፈጸሞ ተገሊጹ። እቲ መጥቃዕቲ ኣብቲ ብሕቡራት ሃገራት ዝሕለወን ዘይተዓጠቐን ቦታ ምፍጻሙ ኣብ መንጎ ሱዳንን ደቡብ ሱዳንን ሓዲሽ ወጥሪ ከምዝፈጥር ስግኣት ኣሎ። ሕቡራት ሃገራት ነቲ መጥቃዕቲ ብምውጋዝ፡ እዚ ስጉምቲ ኣብቲ ሃገር ኣብ ዘሎ ከቢድ ሰብኣዊ ቅልውላውን ዓጸቦን ዝያዳ ጸቕጢ ከምዝፈጥር ገሊጹ። ቢቢሲ ቨሪፋይ ነቲ ዕዳጋን ከባቢኡን ዝዓነወሉ መርትዖታት ብምርካብ ነቲ ፍጻሜ ኣረጋጊጹ ኣሎ።