ኣብ ደሴት ላምፔዱሳ ብዘጋጠመ ሓደጋ ምጥሓል ጃልባ ህይወቶም ንዝሰኣኑ 368 ሰባት ዝኽሪ ይካየድ ኣሎ

ቅድሚ 13 ዓመታት ኣብ ጥቓ እታ ኢጣልያዊት ደሴት ላምፔዱሳ ብዘጋጠመ ሓደጋ ምጥሓል ጃልባ ህይወቶም ንዝሰኣኑ 368 ሰባት ንምዝካር፡ ሎሚ 3 ጥቅምቲ 2026 ኣብታ ደሴት ስነ-ስርዓት ዝኽሪ ይካየድ ኣሎ። እታ ኣብ 2013 ካብ ሊብያ ዝተበገሰት ጃልባ ባርዕ ሓዊ ተላዒልዋ ኣብ ዝጥሓለትሉ እዋን፡ ህይወቶም ካብ ዝሰኣኑ መብዛሕትኦም ኤርትራውያን እዮም። እቲ 'መዓልቲ ዝኽርን ቅበላን' ተባሂሉ ዝፍለጥ ዓመታዊ ዝኽሪ፡ ድሕሪ እቲ ሓደጋ ኣብ 2016 ብኢጣልያ ዝጀመረ እዩ። ናይዚ ዓመቱ መደባት ኣብ ትሕቲ "ድምጽታት ማእከላይ ባሕሪ" ዝብል ቴማ ዝካየድ ዘሎ ኰይኑ፡ ካብ ዝተፈላለያ ሃገራት ኤውሮጳ ዝመጹ ተምሃሮ፡ ካብቲ ሓደጋ ዝደሓኑን ስድራቤታትን ዝተሳተፍዎ ዓውደ-መጽናዕትታትን ናይ ዝተፈላለዩ ሃይማኖታት ናይ ጸሎት ስነ-ስርዓትን ዘካተተ እዩ።