ኣብ ኣበርገለ የጭላ፡ ዘይመኸነ ፈንጂ ብዘጋጠሞ ፍንጀራ 8 ሰባት ሞይቶም

ኣብ ክልል ትግራይ ወረዳ ኣበርገለ ከተማ የጭላ፡ ካብ መኽዘን ኣፅዋር ዝተኣከበ ዘይመኸነ ፈንጂ ብምፍንጃሩ ሸሞንተ ሰባት ሞይቶም ብዙሓት ድማ ቆሲሎም። እቲ ሓደጋ ዘጋጠመ መዓልቲ ነበርቲ ሓፂነ-መፂን ኣብ ዝእክብሉ ቦታ እዩ። ካብቶም ዝሞቱ ህፃናት ዝርከብዎም ኮይኖም፡ ኣብቲ ቦታ ምስ ኣሕዋቶም ይፃወቱ ነይሮም። ኣካያዲ ስራሕ ሆስፒታል የጭላ ከም ዝገለፅዎ፡ ብጠቕላላ 18 ሰባት ተጎዲኦም 15 ናብ ሆስፒታል ከም ዝኣተዉን፡ ካብቶም ግዳያት 10 ከቢድ ጉድኣት ስለዘጋጠሞም ናብ መቐለ ዓይደርን ዓብይዓዲን ሆስፒታላት ከም ዝተልኣኹን ኣረጋጊፆም። እቶም ግዳያት ኣብ መንበሪ ኣባይቲ ንነጋዶ ሓፂነ-መፂን ብምዕዳግ ዝነበሩ ነበርቲ እዮም።