ኣብ ኦሮምያ ዞባ ኣርሲ ወረዳ ሽርካ ድሕሪ መጥቃዕቲ ልዕሊ 20 ሰባት ተኣሲሮም

ኣብ ክልል ኦሮምያ ዞባ ኣርሲ ወረዳ ሽርካ፡ ድሕሪ እቲ ዝተፈጸመ መጥቃዕቲ ንምሕጋዝ ወይ ንምቕባር ዝኸዱ ልዕሊ 20 ሰባት ብሓይልታት ጸጥታ ከም ዝተኣሰሩ ነበርትን ምንጭታትን ንቢቢሲ ገሊጾም። እቶም ተኣሲሮም ዘለዉ፡ ከም ኣዴታትን ቈልዑን ዝኣመሰሉ ሰላማዊያን ሰባት ምዃኖም ተፈሊጡ።

እቶም ነበርቲ እቲ ማእሰርቲ ዝተኻየደ፡ “ንዕጡቓት ሓበሬታ ሂብኩም” ወይ “ደገፍቲ ፋኖ ኢኹም” ብዝብል ክሲ ምዃኑ ይገልጹ። እቶም ነበርቲ ግና እቲ ክሲ መሰረት ዘይብሉ ምዃኑ ይዛረቡ። ምምሕዳር እቲ ወረዳን ዞባን ብዛዕባ እቲ ማእሰርቲ ዝኾነ ምላሽ ኣይሃቡን። ኣብቲ ከባቢ ኣብ ዝሓለፈ ሰሙን ብዝተፈጸመ መጥቃዕቲ 60 ዝበጽሑ ሰባት ከም ዝተቐትሉ ይዝከር።