ኣብ ኢትዮጵያ ዝተባባሰ ጸጥታ፡ ኣብ ሓንቲ ሰሙን ልዕሊ 90 ሰባት ተቐቲሎም

ካብቲ ኣብ ሰሜን ኢትዮጵያ ዝካየድ ዘሎ ውግእ ወጻኢ፡ ኣብ ዝሓለፈ ሰሙን ኣብ ዝተፈላለዩ ከባቢያት እታ ሃገር ብዘጋጠመ ተኸታታሊ መጥቃዕትታትን ግጭታትን ብውሕዱ 90 ሰባት ከም ዝተቐተሉ ተገሊጹ። እዚ ብፍላይ ኣብ ክልል ኦሮምያ፡ ኣብ ከተማ ሞያለን ኣብ ክልል ደቡብ ኢትዮጵያን ዘጋጠመ ደማዊ ፍጻመታት ንብዙሓት ዜጋታት ግዳይ ሞትን ምምዝባልን ገይሩ ኣሎ። ኣብ ዞባ ኣርሲ ጥራይ ልዕሊ 60 ሰባት ከም ዝተቐተሉ ክግለጽ ከሎ፡ ቅዱስ ሲኖዶስ ኦርቶዶክስ ተዋህዶ ቤተ ክርስትያን ኢትዮጵያ ነዚ ኣረጋጊጹ እዩ። ብተወሳኺ ኣብ ፋብሪካ ሽኮር ፊንጫእ ብዝተፈጸመ መጥቃዕቲ ብውሕዱ ሸሞንተ ሰራሕተኛታትን ኣባላት ጸጥታን ተቐቲሎም።

ኣብ ከተማ ሞያሌ ድማ ብሰንኪ ምስሕሓብ ባንዴራን ዶብን ኣብ መንጎ ክልል ኦሮምያን ሶማለን ብዘጋጠመ ግጭት ትሽዓተ ሰባት ተቐቲሎም 30 ድማ ቈሲሎም። ኣብ ዞባ ቡርጂ እውን ሓሙሽተ ሓረስቶት ብዕጡቓት ተቐቲሎም። እቲ መጥቃዕቲ፡ እቲ ፈደራል መንግስቲ ኣብ ሰሜን ኢትዮጵያ ዝወስዶ ዘሎ ስጕምቲ ኣንፈቱ ንምስሓት ዝዕላማ ገይሩ ዝተፈጸመ ምዃኑ መንግስቲ ክልል ኦሮምያ ገሊጹ።