ኣብ ኣላማጣ ብሰንኪ ዝተወልዐ ሓድሽ ግጭትን ደብዳብ ከቢድ ብረትን ልዕሊ 50 ሰለማውያን ሰባት ተቐቲሎም

ኣብ ከተማ ኣላማጣን ከባቢኣን ብሰንኪ ዝተወልዐ ሓድሽ ወተሃደራዊ ግጭት፡ ኣብ ውሽጢ ሰለስተ መዓልታት ጥራይ ልዕሊ 50 ሰለማውያን ሰባት ብደብዳብ ከቢድ ብረት ከም ዝተቐትሉ ነበርቲ እቲ ከባቢ ንቢቢሲ ሓቢሮም። ሓደ ብዓል ሞያ ጥዕና ካብ ዕሸል ጀሚሩ ክሳብ ኣረጋውያን ዝተጐድኡሉ እቲ መጥቃዕቲ ኣብ መንበሪ ኣባይቲን ዕዳጋን ዘወረደ ምዃኑ ብምሕባር፡ ዛጊት 52 ዝሞቱ ሰለማውያን ሰባት ምምዝጋቦም ኣረዲኡ። ሓይልታት ትግራይ ነታ ከተማ ገዲፎም ድሕሪ ምውጻኦም፡ ሰራዊት ምክልኻልን ፈደራል ፖሊስን ንከተማ ኣላማጣን ትካላት መንግስቲን ኣብ ትሕቲ ቍጽጽሮም ኣእቲዮምዋ ይርከቡ። ኣብቲ ከባቢ ኣገልግሎት ተለፎንን ኢንተርነትን ብምቍራጹ እቲ ሓበሬታ ብናጻ ወገን ምራጋገጽ ዘይተኻእለ እንተኾነ፡ ካብ ፈደራላዊ መንግስቲ፡ ግዝያዊ ምምሕዳር ትግራይ ወይ ምምሕዳር ኣምሓራ ወግዓዊ መግለጺ ኣይተዋህበን።