Oromiyaa Lixaa keessatti namoonni 20 ol mana murtii osoo hin dhiyaatin hidhamuun himame

Godina Oromiyaa Lixaa aanaa Saayuu Noolee keessatti namoonni 20 ol mana murtii osoo hin dhiyaatin ji'ootaaf hidhamanii akka jiran himameera. Barsiisaan seeraa Yuunivarsitii Mattuu obbo Keensaa Dagafaa fi jiraattonni naannichaa akka jedhanitti, hidhamtoonni kun ji'a Hagayyaa 2018 irraa jalqabee kan hidhaman yoo ta'u, baay'een isaanii maaliif akka hidhaman illee hin beekan. Barsiisaan seeraa kun gochi kun seeraan ala fi kabaja mirga namoomaa kan tuqu ta'uu ibsaniiru.

Ajajaan poolisii aanaa Saayuu Noolee, Komaander Asabbii Bultii gama isaaniitiin, namoonni hidhaman kun haala yeroo fi shakkii yakkaan kan qabaman ta'uu ibsaniiru. Godinichatti sababa haala yerootiin namoonni 25 to'annoo jala akka jiran kan ibsan ajajichi, dhimmi isaanii mana gorsa nageenyaatiin ilaalamaa akka jiru beeksisaniiru. Hidhaan kun amanummaa sirna haqaa irratti shakkii akka uumu himamaa jira.