ኣብ ክልል ትግራይ ግጭት ገና ይቕጽል ከምዘሎ ነበርቲ ገሊጾም

ኣብ ክልል ትግራይ ግጭትን ውግእን ገና ከምዘሎ ነበርቲ ንዶይቼ ቬለ ገሊጾም። ሓይልታት ፈደራል መንግስቲ ዋና ከተማታት እቲ ክልል እንተተቖጻጸሩ እውን፡ ኣብ ዝተፈላለዩ ግንባራት ውግእ ከምዘሎ ተገሊጹ። እቶም ነበርቲ እቲ ግጭት ዘይምቁራጹ ንህዝቢ ዓቢ ስግኣት ከምዝፈጠረን ተስፋ ሰላም ከምዘዳኸመን ገሊጾም። ብኻልእ ወገን፡ ውድብ ጥዕና ዓለም (WHO) ኣብ ሰሜን ኢትዮጵያ ዘሎ ግጭት ትካላት ጥዕና ከምዝጎደአን ህይወት ሲቪላት ከምዝቐጠፈን ኣፍሊጡ። ነበርቲ እቲ ፈደራል መንግስቲ ብዛዕባ ህሉው ኩነታት እቲ ግጭት ግልፂ ሓበሬታ ብዘይምሃቡ ቅሬታ ኣቕሪቦም እዮም።