በትግራይ ክልል የንግድ እንቅስቃሴና የመልሶ ግንባታ ስራዎች እየተከናወኑ መሆኑ ተገለጸ

በትግራይ ክልል የፌዴራል መንግሥት ባለአደራ አስተዳደር የኢኮኖሚና መልሶ ግንባታ ዋና አስፈጻሚ ቴዎድሮስ አረጋይ (ዶ/ር)፣ በክልሉ የንግድ እንቅስቃሴን ለማነቃቃትና ገበያን ለማረጋጋት እየተሰራ መሆኑን ገለጹ። አስተዳደሩ ከተቋቋመ ጀምሮ የተጎዱ ማህበራዊና ኢኮኖሚያዊ መዋቅሮችን በመጠገን ሕዝቡን ወደ መደበኛ ህይወት ለመመለስ ጥረት እያደረገ ነው። በሕወሓት ምክንያት ተቋርጠው የነበሩ የመሠረተ ልማት አገልግሎቶች ወደ ቀድሞ ሁኔታቸው እንዲመለሱ መደረጉን ዋና አስፈጻሚው ጠቁመዋል።

ከባለሃብቶችና ከባንኮች ጋር በመተባበር የምግብና የፍጆታ አቅርቦቶች ወደ ክልሉ እንዲገቡ እየተደረገ መሆኑን ተናግረዋል። በተጨማሪም በሕዝብ የውይይት መድረኮች የሚነሱ ጥያቄዎች ምላሽ እያገኙ እንደሆነና በመቐለ የተጀመረውን ትምህርት በሌሎች አካባቢዎች ለማስፋት ዝግጅት እየተደረገ መሆኑን አክለዋል። የፌዴራል መንግሥት በክልሉ ሰላም እንዲሰፍንና የመልሶ ግንባታው እንዲቀጥል ትኩረት ሰጥቶ እየሰራ መሆኑን ኢዜአ ዘግቧል።