ኣብ ክልል ትግራይ ንጥፈታት ንግድን እንደገና ምህናጽን ይካየድ ከምዘሎ ተገሊጹ

ኣብ ክልል ትግራይ ናይ ፌደራል መንግስቲ በዓለ መዚ ምምሕዳር ኣፈጻሚ ስራሕ ኢኮኖሚን እንደገና ምህናጽን ዶ/ር ቴዎድሮስ ኣረጋይ፡ ኣብቲ ክልል ንጥፈታት ንግዲ ንምትንታቕን ዕዳጋ ንምርግጋእን ይሰርሑ ከምዘለዉ ገሊጾም። እቲ በዓለ መዚ ካብ ዝተወደበሉ ግዜ ጀሚሩ፡ ዝተሃስዩ ማሕበራዊን ኢኮኖሚያዊን መዋቕራት ብምጽጋን ህዝቢ ናብ ስሩዕ ህይወቱ ንምምላስ ጻዕሪ ይግበር ኣሎ። ብጉጅለ ህወሓት ምኽንያት ተቋሪጾም ዝነበሩ መሰረተ ልማታትን ኣገልግሎት ወሃቢ ትካላትን ናብ ስሩዕ ስርሖም ከምዝተመልሱ እቶም ኣፈጻሚ ስራሕ ኣመልኪቶም።

ምስ ባለሀብታትን ባንክታትን ብምውህሃድ ናይ መግብን ፍጆታን ኣቕርቦት ናብቲ ክልል ከምዝኣቱ ይግበር ከምዘሎ ገሊጾም። ብተወሳኺ ኣብ ናይ ህዝቢ ዘተታት ዝለዓሉ ሕቶታት መልሲ ይረኽቡ ከምዘለዉን፡ ኣብ መቐለ ዝጀመረ ትምህርቲ ናብ ካልኦት ከባቢታት ንምስፋሕ ምድላዋት ይግበር ከምዘሎ ኣረዲኦም። መንግስቲ ፌደራል ኣብቲ ክልል ሰላም ንኽዓስልን ስራሕቲ እንደገና ምህናጽ ንኽቕጽልን ትኹረት ሂቡ ይሰርሕ ከምዘሎ ኢዜኣ ጸብጺቡ።