ኣብ ወረዳ ሰሃላ ሰየምት ዞባ ዋግ ኽምራ ዝተኸስተ ደርቂ፡ ነታባት ናብ ከቢድ ጥሜት ኣቃሊዑ

ኣብ ወረዳ ሰሃላ ሰየምት ዞባ ዋግ ኽምራ ብሰንኪ ፌኖሜኖ ኤልኒኖ ዝተኸስተ ኸቢድ ደርቂ፡ ነበርቲ ኣብ ከቢድ ጥሜት ኣውዲቕዎም ኣሎ። ሓረስቶት ዝዘርእዎ ማሽላ፡ ጤፍን ዳጉሳን ብዘይ ዝናብ ስለዝነቐፀ፡ እቶም ነበርቲ ንኩነታት ህይወት ኣብ ሓደጋ ዝተቓለዐ ዓቢ ፀገም መግቢ ገጢምዎም ይርከብ። እቲ ደርቂ ብተወሳኺ ንምስታይ ዝኸውን ፅሩይ ማይ ብዘይምህላዉ ንሰባት ይኹን ንእንስሳት ኣብ ከቢድ ፅምኢ ኣቃሊዕዎም ኣሎ። ብፍላይ ኣዴታት፡ ሕፃናትን ኣረጋውያንን ብሰንኪ እዚ ጥሜት ንዝኸፈአ ሓደጋ ጥዕና ተቓሊዖም ይርከቡ። እቲ ማሕበረሰብ ንመግቢ ጥራይ ዘይኮነስ፡ ንዝመፅእ ወቕቲ ዝኸውን ዘርእን ንእንስሳት ዝኸውን መግቢን ብቕልጡፍ ክውሃቦም ፃውዒት ኣቕሪቦም ኣለዉ።