ኮሎኔል ተወልደ ገብረትንሣኤ ካብ እሱራት ከም ዘምለጡን ናብ መቐለ ከም ዝኣተዉን ኣፍሊጦም

ኮሎኔል ተወልደ ገብረትንሣኤ ምስ ዩኤምዲ ሚዲያ ኣብ ዘካየድዎ ቃለ መሕትት፣ ካብ እሱራት ከም ዘምለጡን ሰሉስ ንግሆ ናብ መቐለ ከም ዝኣተዉን ኣፍሊጦም። ምስ ሌተናል ጄነራል ታደሰ ወረደ ኣብ ጥቓ ዶብ ኤርትራ ኣብ እትርከብ ራማ ተታሒዞም ከም ዝነበሩ ዝገለፁ እቶም ኮሎኔል፣ ካብ እሱራት ንኽወፅኡ ዝጠቐመ መደብ ኣብ ቀዳም ምሸት ከም ዝተነደፈን ሰኑይ ንግሆ ከም ዝተፈፀመን ሓቢሮም።

ንምምላጦም ንዘኽኣሎም ድጋፍ ሓለውቲ፣ ሹፌራትን ኣባላት ምምሕዳር ወረዳ ራማን ዓቢ ተራ ከም ዝነበሮም ሓቢሮም። ኮሎኔል ተወልደ ናብ መቐለ ዝኣተዉ ብውልቀን ሲቪል ኮይኖም ከም ዝኾኑን፣ ምስ ሌተናል ጄነራል ታደሰ ወረደን ካልኦት መሳርሕቶምን ብተናፀል ከም ዝኣተዉ ገሊፆም።