ሳዑዲ ዓረቢያ ኣብ ልዕሊ ሓደ ዜጋ ስሪላንካ ኣውሪዳቶ ዝነበረት ፍርዲ ሞት ሰሪዛ

ላዕለዋይ ቤት ፍርዲ ሳዑዲ ዓረቢያ ነቲ ብሰንኪ ኣብ ፌስቡክ ኣብ ዝጸሓፎ ርእይቶ "ንእስልምናን ነብዪ መሓመድን ጸሪፍካ" ብዝብል ብሞት ተፈሪዱ ዝነበረ ወዲ 27 ዓመት ዜጋ ስሪላንካ ኣኖጃን ሲቫራሳ ዝነበረ ፍርዲ ሞት ከም ዝሰረዞ ተገሊጹ። እዚ ውሳነ ዝተሓበረ ብምክትል ሚኒስትር ጉዳያት ወጻኢ ስሪላንካ ኣሩን ሄማቻንድራ ኮይኑ፡ ውሳነኡ ድማ ድሕሪ ኣብ መንጎ ክልቲአን ሃገራት ዝተገብረ ዲፕሎማስያዊ ጻዕርታት ዝመጸ እዩ። ሲቫራሳ ኣብ እዋን ሃይማኖታዊ ክርክር ኣብ ዝሃቦ ርእይቶ'ኳ እንተተቀጽዐ፡ ነቲ ጽሑፍ ከም ዘጥፍኦን ይቕሬታ ከም ዝሓተተን ኣብቲ እዋን ገሊጹ ነይሩ። እቲ ፍርዲ ሞት እኳ እንተተሰረዘ፡ ክሳብ ሕጂ ኣብ ቤት ማእሰርቲ ከም ዝጸንሕን ካልእ ቅጽዓት ከም ዝጽበዮን ተፈሊጡ ኣሎ።