ኣብ ዩኒቨርሲታት ትግራይ ዝርከቡ መምህራን ንኣዋርሕ መሃያ ኣይተኸፍሉን

ኣብ ዩኒቨርሲታት ትግራይ ዝርከቡ መምህራን ንነዊሕ ኣዋርሕ መሃያ ከይተኸፈሉ ከምዝጸንሑ ተገሊጹ። ማሕበር መምህራን ዩኒቨርሲታት ኢትዮጵያ ከምዝሓበሮ፣ ኣብ ዩኒቨርሲታት ኣክሱም፣ ዓዲግራትን ራያን መሃያ ናይ 12 ኣዋርሕ፣ ኣብ ዩኒቨርሲቲ መቐለ ድማ መሃያ ናይ 14 ኣዋርሕ ከይተኸፍለ ተሪፉ ኣሎ።

እዚ ዘይምኽፋል መሃያ ነቶም መምህራንን ስድራቤቶምን ኣብ ከቢድ ጸገም ኢኮኖሚ ከምዝወደቑ ገይርዎም ኣሎ። ማሕበር መምህራን ዩኒቨርሲታት ኢትዮጵያ ነዚ ጉዳይ ቀዳምነት ብምሃብ፣ ነቶም መምህራን ንምድጋፍ ግዝያዊ ገንዘብ ንምእካብ ስራሕ ከምዝጀመረ ኣፍሊጡ። ተጠቀምቲ ዝኾኑ መምህራን ንምፍላጥ መጽናዕቲ እናተገበረ ዘሎ ክኸውን ከሎ፣ እቲ ሓገዝ ዝከፋፈለሉ መገዲ ምስ ተወከልቲ ዩኒቨርሲታት ብምዝታይ ኣብ ዝመጽእ ግዜ ከምዘፍልጡ ተገሊጹ።