ኣብ ሞያሌ ብሰንኪ ወሰናዊ ምስሕሓብ ክልላት፡ ጸጥታ ብምዝራጉ ተኹሲ ተኸሲቱ

ከተማ ሞያሌ ኣብ መንጎ ክልል ኦሮሚያን ሶማሌን ብሰንኪ ዘጋጠመ ወሰናዊ ምስሕሓብ ከቢድ ወጥሪ ተፈጢሩዋ ኣሎ። እቲ ግጭት ዝጀመረ ኣብ ሓደ ከባቢ ሰንደቅ ዓላማ ናይ ምትካልን ናይ ምክልኻልን ሙከራ ስዒቡ እዩ። ኣብዚ ግጭት ሓደ መንእሰይ ህይወቱ ዝሰኣነ ክኸውን ከሎ፡ ካብ ትማሊ ምሸት ዝጀመረ ተኹሲ ብምባባሱ ነበርቲ ኣብ ከቢድ ፍርሂ ወዲቖም ኣለው።

ሎሚ እታ ከተማ ትርምስ ዝሰፈና ክትኸውን ከላ፡ እቲ ዓቢ መገዲ ንግዲ ኢትዮ-ኬንያን ካልኦት ትካላትን ተዓጽዮም ውዒሎም። ነበርቲ ተኹሲ ከምዝሰምዑን ገለ ሰባት ናብ ጎረቤት ኬንያ ከምዝሃደሙን ይገልጹ። መንግስቲ ብዛዕባ እቲ ኩነታት ወይ ብዛዕባ ዘሎ ሓይሊ ጸጥታ ዝሃቦ መግለጺ የለን።