ሜጀር ጀነራል ዮሃንስ ወልደጊዮርጊስ በቁጥጥር ስር ዋሉ

የቀድሞ የትግራይ ታጣቂዎች ከፍተኛ አዛዥ ሜጀር ጀነራል ዮሃንስ ወልደጊዮርጊስ (ጆን መዲድ) በሀገር መከላከያ ሰራዊት ቁጥጥር ስር መዋላቸው ተረጋግጧል። የትግራይ ሰላም ኃይል አመራር እንዳረጋገጡት፣ ጀነራሉ ዛሬ በትግራይ ማእከላዊ ዞን ስምረት ቀበሌ በሰራዊቱ ከበባ ውስጥ ገብተው መያዛቸውን ገልጸዋል። ከእሳቸው በተጨማሪ ከኮሎኔል እስከ ሻለቃ ማዕረግ የነበራቸው 7 የጦር መኮንኖች እና 18 የስታፍ አባላት በአጠቃላይ 25 ሰዎች መያዛቸው ተጠቁሟል።

ሜጀር ጀነራል ዮሃንስ ከጥቅምት 2013 ዓ.ም ጀምሮ ከህወሓት ጎን ተሰልፈው ሲያዋጉ የቆዩ ሲሆን፣ ከዚህ ቀደም በሀገር መከላከያ ሰራዊት አገልግለው በጡረታ የተሰናበቱ ነበሩ። በቅርቡ "አንድ ትውልድ ለሰዋዕትነት መዘጋጀት አለበት" በማለት ሲናገሩ የነበረው ጀነራሉ፣ አሁን በቁጥጥር ስር ውለው ምርመራ እየተደረገላቸው ይገኛል።