14 ሰባት ኣብ ደቡብ ወሎ ብዘጋጠመ መጥቃዕቲ ድሮንን መድፍዕን ተቐቲሎም

ዕለት 29 ጥቅምቲ 2024 ኣብ ክልል ኣምሓራ፣ ዞባ ደቡብ ወሎ፣ ወረዳ ተወለደሬ ኣብ ዝርከብ መዓስከር ተመዛበልቲ (Turkish Camp) ብዘጋጠመ መጥቃዕቲ ድሮንን መድፍዕን 14 ሰላማዊ ሰባት ከምዝሞቱ ተገሊጹ። ነበርቲ እቲ መዓስከር ከምዝገለጽዎ፣ 22 ሰባት ከቢድ መውቃዕቲ ከምዝበጽሖም ሓቢሮም። እቲ መጥቃዕቲ ካብ ሰዓት 5:30 ክሳብ 6:00 ከምዝተፈጸመ ዝተሓበረ ኮይኑ፣ ተማሃሮ ካብ ቤት ትምህርቲ ክምለሱ ከለዉ እውን ከምዝተጎድኡ ተገሊጹ። ነበርቲ ቅድሚ እቲ መጥቃዕቲ ድሮን ክትሰልል ከምዝጸንሐት ሓቢሮም። ነበርቲ እቲ መዓስከር ኣብቲ ከባቢ ዕጡቓት ፋኖ ከምዘለዉን እቲ መጥቃዕቲ ንዓታቶም ኢላማ ዝገበረ ክኸውን ከምዝኽእል እንተገመቱ፣ መጥቃዕቲ ግን ብምሉኡ ኣብቲ መዓስከር ተመዛበልቲ ስለዝዓረፈ ህዝቢ ከምዝተበተነን ብርቱዕ ስግኣት ከምዘለዎምን ተዛሪቦም። ቲክቫህ ኢትዮጵያ ከምዝጸብጸቦ፣ ገሊኦም ነበርቲ ቁጽሪ ግዳያት ክሳብ 10 ከምዝበጽሕ ገሊጾም።