ምረጻ መሪታት ግዚያዊ ምምሕዳር ትግራይ ናብ መዛዘሚኡ በፂሑ

ምረጻ መሪታት ግዚያዊ ምምሕዳር ትግራይ ናብ መዛዘሚኡ ከምዝበጽሐ ተገሊጹ። እቲ ኣብ ዝሓለፉ ሰሙናት ኣብ ዝተፈላለዩ ዞባታትን ወረዳታትን ክካየድ ዝጸንሐ መስርሕ ምረጻ፣ ሕጂ ናብ ማእከላይን ሰሜን ምዕራብን ዞባታት ተላቢጡ ኣሎ። በዚ መሰረት ኣብ ኣክሱም፣ ሽረ እንዳስላሰን ተምቤን ዓብዪ ዓዲን ሓደስቲ መሪታት ግዚያዊ ምምሕዳር ብድምጺ ህዝቢ ተመሪጾም ኣለዉ።

ብተወሳኺ ኣብ ዓድዋ ዝሓሸ ኩነታት ጸጥታ ተፈጢሩ ብምህላዉ ፖሊስ ከተማ ናብ ስርሑ ከምዝተመልሰን ኣብ ቀረባ እዋን ምረጻ ከምዝካየድን ይግለጽ ኣሎ። መብዛሕትኡ ክፋል እቲ ክልል ብሰራዊት ምክልኻል ሃገርን ሓይሊ ሰላም ትግራይን ተታሒዙ ኣብ ዘሎ ኩነታት እዩ እቲ ምረጻታት እናተካየደ ዝርከብ።