በጉራጌ ዞን የፀጥታ ችግርን ለመፍታት የሽምግልና ጥረት እየተደረገ ነው

በጉራጌ እና ምስራቅ ጉራጌ ዞኖች በተለይም በአበሽጌ እና ምስራቅ ሶዶ ወረዳዎች የሚስተዋለውን የፀጥታ ችግር ለመፍታት ባህላዊ የሽምግልና ጥረት ተጀምሯል። ነዋሪዎች እንደገለጹት ችግሩ ከአጎራባች ኦሮሚያ ክልል በሚመጡ ታጣቂዎች ጥቃት እና በአካባቢው ጫካ ውስጥ ተሸፍተው በሚንቀሳቀሱ ታጣቂዎች የሚፈጠሩ ግጭቶችን ያካተተ ነው። ይህ የፀጥታ ችግር በርካታ ሰዎችን ህይወት የቀጠፈ፣ አካል ያጎደለ እና የገንዘብ ክፍያ እንዲጠየቁ ያደረገ ነው። አሁን ላይ የጉራጌ ዞን አስተዳደር እና የኮማንድ ፖስት ጥያቄ አቅራቢነት “የጆካ” የጉራጌ ባህላዊ ሸንጎ የሰላም ሂደቱን መምራት ጀምሯል። የሸንጎው ሰብሳቢ አጋዝ በላቸው ገብረማሪያም በጫካ ውስጥ ካሉ ታጣቂዎች ጋር ስልክ በመነጋገር በጎ ምላሽ ማግኘታቸውን ገልጸዋል። የሰላም ሂደቱ አካል የሆነ ሥነ-ስርዓት ነገ ሐሙስ በወልቂጤ ከተማ ይካሄዳል።