ሌ/ጄ ጻድቃን ገብረትንሣይ የትግል ኃላፊነታቸውን መጨረሳቸውን አስታወቁ

ሌተናል ጄኔራል ጻድቃን ገብረትንሣይ የትግል ኃላፊነታቸውን እንደጨረሱ በትግራይ የቴሌቪዥን ጣቢያ (ቲ.ቢ.ኤስ) ባደረጉት ቆይታ አስታወቁ። "አሁን ጊዜው የልጆቻችንና የታናናሽ ወንድሞቻችን ነው" ያሉት ጄኔራሉ፣ ስልጣን ለአዲሱ ትውልድ ሊተላለፍና የዲሞክራሲ ባህል ሊያብብ እንደሚገባ ተናግረዋል። ከዚህ በኋላ ማንኛውንም የህዝብ ጥያቄ በሰላማዊ መንገድ ብቻ መፍታት እንደሚገባ አሳስበዋል። በጦርነት የሚመለስ ጥያቄ እንደሌለ የገለጹት ጄኔራሉ፣ ከማንኛውም የተደራጀ ኃይል ጋር ተሰልፈው መሳሪያ እንደማያነሱ አስረድተዋል። ይሁን እንጂ ትግራይ በምትጠይቃቸው የማማከርና የማስታረቅ ስራዎች ላይ ለመሳተፍ ዝግጁ መሆናቸውን ገልጸዋል።