የቀድሞ ተዋጊዎችን ወደ ማቋቋም ሂደት ለማስገባት በዓዲግራት የግንዛቤ ማስጨበጫ ተካሄደ

በዓዲግራት ከተማ የቀድሞ ተዋጊዎችን ወደ ትጥቅ መፍታትና መልሶ የማቋቋም (ዲ.ዲ.ኣር) ሂደት ለማስገባት የሚያስችል የግንዛቤ ማስጨበጫ መድረክ ተካሄደ። መድረኩ የብሔራዊ ተሃድሶ ኮሚሽን ተወካዮችና ሌሎች ባለድርሻ አካላት በተገኙበት የተካሄደ ሲሆን፣ በሂደቱ ዙሪያ ገለጻ ተደርጓል። የዓዲግራት ከንቲባ ኢንጂነር ነጋሲ ተወልደ፣ ሂደቱ ወጣቶች ከትግል ወጥተው ራሳቸውንና ቤተሰቦቻቸውን እንዲያስተዳድሩ ትልቅ እድል እንደሚፈጥር ተናግረዋል። የከተማ አስተዳደሩም የቀድሞ ተዋጊዎቹ በተለያዩ የሥራ ዘርፎች ተሰማርተው ራሳቸውን እንዲለውጡ አስፈላጊውን ድጋፍ እንደሚያደርግ ማረጋገጫ ሰጥተዋል።