የኢትዮጵያ ኤሌክትሪክ ኃይል ከ7 ቢሊዮን ብር በላይ የካሳ ጥያቄ እንዳለበት አስታወቀ

የኢትዮጵያ ኤሌክትሪክ ኃይል ዋና ሥራ አስፈፃሚ ኢ/ር አሸብር ባልቻ ተቋሙ ከ7 ቢሊዮን ብር በላይ የካሳ ክፍያ ክርክር ውስጥ እንደሚገኝ አስታወቁ። የፕሮጀክቶችን ግንባታ ለማፋጠን በሚደረገው ጥረት የካሳ ክፍያ ጉዳይ ዋነኛ ማነቆ መሆኑን ገልጸዋል። ከዚህም በላይ አንዳንድ አካላት የሚሰጡት የሀሰት መረጃዎችና የድጋፍ ደብዳቤዎች ተቋሙን ለተጨማሪ የካሳ ክፍያ እያጋለጡ መሆኑን ጠቁመዋል።

ዋና ሥራ አስፈፃሚው አዲሱ የካሳ አዋጅ በአፈጻጸም መመሪያ እጦት ምክንያት ተግባራዊ መሆን አለመቻሉን ጠቅሰው፣ ይህም ለኃይል ማስተላለፊያና ማከፋፈያ ፕሮጀክቶች መዘግየት ምክንያት እንደሆነ ተናግረዋል። አዲሱ አዋጅ በተግባር ላይ ሊውል አለመቻሉና የክልሎች የአፈጻጸም መመሪያ አለመኖር ተቋሙን ለተደራራቢ የካሳ ክፍያ እየዳረገው መሆኑን አስረድተዋል።