Abbaan Taayitaa Iimaanaarri Itoophiyaa kaffaltii beenyaa birrii biiliyoona 7 ol akka qabu ibse

Hoji geggeessaan Olaanaa Abbaa Taayitaa Iimaanaarri Itoophiyaa, Injiinar Ashebir Balcha, dhaabbatichi himannaa kaffaltii beenyaa birrii biiliyoona 7 ol ta'u irratti falmii seeraa keessa akka jiru ibsan. Dhimmi kaffaltii beenyaa ijaarsa pirojektootaa saffisiisuu irratti gufuu guddaa ta'uu himan. Kana malees, ragaalee sobaa fi xalayaawwan deeggarsaa qaamolee adda addaarraa kennaman dhaabbaticha kaffaltii beenyaa sirrii hin taaneef saaxilaa jiraachuu eeran.

Hoji geggeessaan kun akka jedhanitti, labsii beenyaa haaraan qajeelfama hojiirra oolmaa waan hin qabneef hanga ammaa hojiirra ooluu hin dandeenye. Kunis pirojektoota daddabarsa fi raabsa anniisaa irratti gufuu ta'aa jira. Labsichi naannooleen beenyaa kaffaluuf itti gaafatamummaa akka fudhatan kan ibsu ta'us, qajeelfamni isaanii waan hin baaneef naannooleen itti gaafatamummaa kana bahachuu akka hin jalqabne ibsaniiru.