ኣብ ኣዲስ ኣበባ ኣብ ንግዲ መኪና ሰፊሕ ገቢር ከይተኸፈለ ከምዝፀንሐ ተቓሊዑ

ቢሮ እታዊ መኽሰብ ከተማ ኣዲስ ኣበባ ኣብቲ ከተማ ኣብ ዝርከቡ ማእከላት ንግዲ መኪናን ደላሎን ብዝገበሮ መፅናዕቲ ሰፊሕ ገቢር ከይተኸፈለ ከምዝፀንሐ ኣፍሊጡ። ኣብ ንግዲ መኪና ተዋፊሮም ዝነበሩ ኣካላት ግዴታ ግብሪ እታዊ መኽሰብን ተወሳኺ እሴት ታክስን (VAT) ብግቡእ ከምዘይተዋፅኡ እቲ መፅናዕቲ ኣርእዩ። በዚ መሰረት ዘይሕጋዊ ፍቓድ ዘለዎምን ብኮሚሽን ዝሰርሑ ማእከላት መሸጣ መኪና ክዕፀዉ ተገይሩ ኔሩ።

ሕጂ ብዝተመሓየሸ መምርሒ ስርሖም ንክቕፅሉ ዝተፈቐደሎም ኮይኑ ግና ሓደሽቲ "Zero-Mile" መኪና ብውልቀ ኮሚሽን ምሻጥ ተኸልኪሉ ኣሎ። ሓደሽቲ መኪና ናይ ምሸጥ መሰል ንሕጋዊ ኣእተውቲ (importers) ጥራይ ዝተዋህበ ኮይኑ፡ ደላሎ ክገብርዎ ዝኽእሉ ግን ናይ ኣገልግሎት መኪና ብኮሚሽን ምሻጥ ወይ ብውልቆም ዓዲጎም ዳግማይ ምሻጥ ጥራይ እዩ። ኩሎም ነጋዶ ነቲ ሓድሽ መምርሒ ግብርን ንግድን ክኽተሉ ከምዝግባእ እቲ ቢሮ ገሊፁ።