የአሜሪካ የልማት ፋይናንስ ኮርፖሬሽን በቢሾፍቱ አውሮፕላን ማረፊያ ኢንቨስት ለማድረግ ማቀዱ ተገለጸ

የአሜሪካ የልማት ፋይናንስ ኮርፖሬሽን (DFC) በቢሾፍቱ እየተገነባ ባለው ዓለም አቀፍ አውሮፕላን ማረፊያ እና በዙሪያው ለሚንቀሳቀሱ አነስተኛና መካከለኛ ኢንተርፕራይዞች ብድር ለማቅረብ ኢንቨስትመንት ለመመደብ ዕቅድ ይዟል። የአሜሪካ ውጭ ጉዳይ መሥሪያ ቤት እንደገለጸው፣ ይህ የገንዘብ ድጋፍ በሁለቱ ሀገራት መካከል የሥራ ዕድልን ለመፍጠር፣ የበረራ ግንኙነትን ለማጠናከር እና የጋራ ልማትን ለማበረታታት ያለመ ነው። የአሜሪካ የውጭ ጉዳይ መሥሪያ ቤት የአፍሪካ ጉዳዮች ረዳት ሚኒስትር ፍራንክ ጋርሺያ ከኢትዮጵያ አየር መንገድ ዋና ሥራ አስፈጻሚ መስፍን ጣሰው ጋር ተገናኝተው በጉዳዩ ላይ መክረዋል። ረዳት ሚኒስትሩ አሜሪካ ለቢሾፍቱ አውሮፕላን ማረፊያ ግንባታ አስፈላጊውን የቴክኖሎጂና የኢንቨስትመንት ድጋፍ ለማድረግ ቁርጠኛ መሆኗን አረጋግጠዋል። አሜሪካ በዚሁ ግዙፍ ፕሮጀክት ውስጥ ለመሳተፍ ያላት ፍላጎት ከዚህ ቀደምም ሲገለጽ ቆይቷል።