ኮርፖሬሽን ፋይናንስ ልምዓት ኣሜሪካ ኣብ መዓርፎ ነፈርቲ ቢሾፍቱ ኢንቨስት ንምግባር ከምዝሓሰበ ተገሊጹ

ኮርፖሬሽን ፋይናንስ ልምዓት ኣሜሪካ (DFC) ኣብቲ ኣብ ቢሾፍቱ እናተሃነጸ ዘሎ ዓለምለኸ መዓርፎ ነፈርቲን ኣብ ከባቢኡ ንዘለዉ ንኣሽቱን ማእከለዎትን ትካላት ንምሕጋዝ ዓቢ ኢንቨስትመንት ንምግባር ከምዝሓሰበ ተገሊጹ። ሚኒስትሪ ጉዳያት ወጻኢ ኣሜሪካ ከምዝሓበሮ፡ እዚ ገንዘባዊ ደገፍ ኣብ መንጎ ክልቲአን ሃገራት ዕድል ስራሕ ንምፍጣር፡ መገዲ ኣየር ንምጥንኻርን ልምዓት ንምስፋሕን ዝዓለመ እዩ። ረዳት ሚኒስትር ጉዳያት ወጻኢ ኣሜሪካ ንጉዳያት ኣፍሪቃ ፍራንክ ጋርሺያ ምስ ዋና ፈጻሚ ስራሕ ኢትዮጵያ ኣየር መንገድ መስፍን ጣሰው ተራኺቦም ተዛቲዮም ኣለዉ። እቲ ረዳት ሚኒስትር ኣሜሪካ ንህንጸት መዓርፎ ነፈርቲ ቢሾፍቱ ዘድሊ ቴክኖሎጂን ኢንቨስትመንትን ንምቕራብ ቆራጽ ከምዝኾነት ኣረጋጊጾም። ኣሜሪካ ኣብቲ ዓቢ ፕሮጀክት ንምስታፍ ዘለዋ ድልየት ቅድሚ ሕጂ እውን ክግለጽ ጸኒሑ እዩ።