ኣብ መንጎ ዞባታት ምዕራብ ጉጂን ኮሬን ዘሎ ምስሕሓብ መግለጺታት

ኣብ መንጎ ሓላፊ ሰላምን ጸጥታን ዞባ ምዕራብ ጉጂ ኣቶ ኣየለ ዳምባን ምምሕዳር ዞባ ኮሬን ምስሕሓብ መግለጺታት ተፈጢሩ። እቲ ምስሕሓብ ዝጀመረ፡ ኣቶ ኣየለ 'ኦነግ ሸኔ ንዞባ ኮሬ ከም መፍለቒ ሎጂስቲክስ ይጥቀመሉ' ብዝብል ንዝሃብዎ መግለጺ ተኸቲሉ እዩ። ምምሕዳር ዞባ ኮሬ ነቲ መግለጺ ብጽኑዕ ብምቅዋም፡ እቲ ሓበሬታ ካብ ሓቂ ዝረሓቐን ንህዝቢ ዘቆጥዕን ምዃኑ ገሊጹ።

ኣቶ ኣየለ ዳምባ ብወገኖም፡ ኣብ ደረጃ ውዳበ መንግስቲ ደገፍ ከምዘየለ እንተገለጹ፡ ብደረጃ ውልቀ ሰባት ግን ገለ ሰባት ምስቲ ዕጡቕ ጉጅለ ምትእስሳር ከምዘለዎም ኣረጋጊጾም። ሓላፊ ኮሚኒኬሽን ዞባ ኮሬ ኣቶ ኣሸብር ገዙ ብወገኖም፡ ህዝቢ ኮሬ ባዕሉ ብእቲ ዕጡቕ ጉጅለ ይጥቃዕ ከምዘሎ ብምግላጽ፡ እቲ ዝቐረበ ክሲ ነጺጎምዎ።