ዓይነስውራት ተመሃሮት ጸገም ምደባ ዩኒቨርሲቲ ከጋጠመና ኢሎም፤ ሚኒስትሪ ምላሽ ሂቡ

ኣብ መወዳእታ ክፍሊ 12 ዝሓለፉ ዓይነስውራት ተመሃሮ ምደባ ዩኒቨርሲቲኦም ክፈልጡ ከምዘይከኣሉ ብምግላጽ ንቲቫህ ኢትዮጵያ ቅሬታኦም ኣቅሪቦም። ተመሃሮ እቲ ዝረኸብዎ ነጥቢ ንምደባ ዘብቅዕ እንተኾነ'ውን፣ ብኦንላይን ብዝስራዕ ሲስተም ምደባኦም ክርእዩ ከምዘይከኣሉ ገሊጾም። ሚኒስትሪ ትምህርቲ ነቲ ጉዳይ ኣጻሪዩ ምላሽ ከምዝህብ ኣፍሊጡ። ሚኒስትር ዲኤታ ፕሮፌሰር ክንደያ ገብረህይወት ተመሃሮ በቲ ናይ ኦንላይን መቅረቢ ቅሬታ ሊንክ ኣቢሎም ሓበሬታኦም ክልእኩ ኣዘኻኺሮም። እቲ ሓበሬታ ተሳሒቱ ወይ ዘይተማለአ እንተኾይኑ እቲ ጌጋ ክኽሰት ከምዝኽእል ዝሓበሩ ሚኒስትር፣ ብውልቀኦም ከምልከቱ ኣተሓሳሲቦም። ተመሃሮ ብኣካል ናብ ሚኒስትሪ ክኸዱ ከምዘይብሎምን ቅሬታኦም በቲ ድረ-ገጽ ጥራይ ከቕርቡ ከምዝኽእሉ ተገሊጹ።