Manni Maree Barnoota barattoota Yuunivarsitii Tigraay irratti ibsa kenne

Manni Maree Barnootaa dhimma barattoota yuunivarsitii naannoo Tigraay keessatti barataa jiran irratti ibsa kenneera. Barattootni sababa haala naannichaa keessa jiruun gara yuunivarsitii biroo akka jijjiiramaniif gaaffii dhiyeessan, yeroof kan ramadaman yuunivarsitii kam akka ta'e dafee akka beeksisamu ibsameera.

Akkaataa barattootni haaraa fi durii naannichatti barnoota isaanii itti fufuu danda'an irratti yuunivarsitiiwwan wajjin mariin taasifamaa jira. Barattootni yeroof gara yuunivarsitii biroo ramadaman, haalli yeroo mijataa ta'ee fi tasgabbaa'e booda, gara yuunivarsitii isaanii isa jalqabaatti akka deebi'an ibsameera. Barattootni hanga murtiin kun beekamutti obsaan akka eeggatan gaafatameera.