ሾብዓተ ዕጡቅ ሓይልታትን ውድባትን ሓድሽ ጥምረት ከምዝመስረቱ ኣፍሊጦም

ከም ህወሓት፣ ፋኖ (ኣፋብን) ከምኡ እውን ሰራዊት ሓርነት ኦሮሞ (ኦነሰ) ሓዊሱ ሾብዓተ ዕጡቅ ሓይልታትን ፖለቲካዊ ውድባትን "ጥምረት ህዝባዊ ሓይልታት ኢትዮጵያ ንህልውና" ዝተሰመየ ሓድሽ ጥምረት ከምዝመስረቱ ብዕለት 10 መስከረም 2019 ዓ.ም ኣብ ዘውፅእዎ መግለፂ ኣፍሊጦም። ኣብዚ ጥምረት ግንባር ሓርነት ህዝቢ ኦጋዴን፣ ተጋድሎ ሓርነት ህዝቢ ቤንሻንጉልን፣ ናይ ጉሙዝ ህዝቢ ደሞክራስያዊ ምንቅስቃስን ተኻቲቶም ኣለዉ።

ኣቦ መንበር ፋኖ ኣቶ ዘመነ ካሴ ኣብ ትግራይ ቴሌቪዥን ብዝተመሓላለፈ መግለፂ ኣቦ መንበር ናይቲ ጥምረት ኮይኖም ከምዝተመረፁ ኣፍሊጦም። እቲ ጥምረት ቀንዲ ዕላማኡ ብቻርተር ሽግግር ዝምራሕ ኣካታቲ መንግስቲ ሽግግር ምምስራት ምዃኑ ሓቢሮም።