አቶ ጌታቸው ረዳ በኤርትራ መንግሥት እና በታጣቂ ቡድኖች ላይ ወቀሳ አቀረቡ

የቀድሞ የትግራይ ጊዜያዊ አስተዳደር ፕሬዝዳንት እና የአሁኑ የጠቅላይ ሚኒስትሩ አማካሪ አቶ ጌታቸው ረዳ፣ የኤርትራ መንግሥት ከግብፅ ጋር በመተባበር የምስራቅ አፍሪካን ሰላም ለማደፍረስ እየሰራ መሆኑን ተናግረዋል። አቶ ጌታቸው ከ"Pulse of Africa" ጋር ባደረጉት ቃለ ምልልስ፣ ኤርትራ ራሷ በቀጥታ ጦርነት ከመግባት ይልቅ ፋኖን፣ ኦነግ ሸኔን እና ሕወሓትን እንደ መሳሪያ በመጠቀም ግጭቶችን ለማቀጣጠል እየሞከረች ነው ብለዋል።

በተለይም ሕወሓት እና የኤርትራ መንግሥት ጥምረት ለትግራይ እና ለአማራ ሕዝብ አደገኛ መሆኑን የገለጹት አማካሪው፣ የኢትዮጵያ ፌዴራል መንግሥት እስካሁን ትዕግስት እያሳየ ቢሆንም፣ ሕወሓት በኤርትራ ወጥመድ ወድቆ ጥቃት ከሰነዘረ ሰፊ ጦርነት ሊነሳ እንደሚችል አስጠንቅቀዋል። ዓለም አቀፉ ማህበረሰብም የሰላም አፍራሾችን ለመግታት በኤርትራ ላይ ጫና እንዲፈጥር ጥሪ አቅርበዋል።