ዩናይትድ ኪንግደም ኣብ ትግራይ ሓይልታት ዝካየድ ዘሎ መጥቃዕቲ ኮኒና

ዩናይትድ ኪንግደም ሓይልታት ትግራይ ኣብ ዓፋርን ደቡብ ትግራይን ዘካይድዎ ዘለዉ መጥቃዕትን ንመዕረፊ ነፈርቲ ምቁጽጻሮምን ብጽኑዕ ኮኒና። ላዕለዋይ በዓል ስልጣን ዩናይትድ ኪንግደም ክርስቲ ማክኒል፣ ህዝቢ ኢትዮጵያ ዳግማይ ናብ ኲናት ምምላስ ክጻወሮ ከምዘይክእል ብምግላጽ፣ ወታደራዊ ስጉምቲ ብህጹጽ ደው ክብል ጸዊዖም።

ዩናይትድ ኪንግደም ኩሎም ወገናት ብኣመራርሓ ሕብረት ኣፍሪካ ናብ ዝካየድ ዘተ ክምለሱን ግጭቱ ኣብ ደቂ ኣንስትዮን ህጻናትን ዘለዎ ጽልዋ ኣብ ግምት ከእትዉን ኣተሓሳሲባ። ብተወሳኺ "ትብብር ለህልውና" ዝብል ጥምረት መንግስቲ ኢትዮጵያ ንምግልባጥ ዘለዎ ዕላማ ከምዘይትድግፍ ብምግላጽ፣ ሰብኣዊ ሓገዝ ብዘይ ገደብ ንዝተጎድኡ ክበጽሕን ድሕንነት ሰብኣዊ ሰራሕተኛታት ክኽበርን ጸዊዓ ኣላ።